السلام عليكم ورحمة الله وبركاته
ازيكم يا شبات يا قمرات
هوريكم النهردة نوع من الانواع اللى عندى شكله حلو جدا وسهل العناية بيه جدا جدا
غير انه سريع النمو ماشاء الله وسهل تكاثره
النبات اللى بتكلم عنه اسمه كوليوس ودى صور ليه
شوفتوا جماله
النبات دة ممكن نحطه فى الظل وبيبقى لونه زى اللى فى الصورة وممكن نتلاقى فى وسط الورقة لون فوشيا
ولو اتحط فى الشمس بيبقى لونه اخضر و فيه خطوط نبيتى غامق سبحان الله حتى سمك الورقة بيختلف على حسب المكان الموجود فيه
انا زارعة منه فى المطبخ وفى البلكونة من نفس النبتة بس الاتنين شكلهم دلوقتى مختلف خالص عن بعض
بس هو مش بيحب الشمس الشديدة اوى يعنى فى الايام الحر اوى ابعدوه عن الشمس المباشرة
نيجى بقى لطريقة التكاثر بتاعته
هناخد فرع منه طوله مثلا 10 سم و نحطه فى برطمان ماية ونغيرله الماية كل يوم بعد فترة قليلة هنتلاقيه طلع جذور زى الصورة دى
ساعتها هننقله للتربة وبعد فترة قصيرة هنتلاقاه كبر اوى ونقدر ناخد منه فروع تانية و نكاثرها
طيب دة هتلاقوه فين ؟ النوع دة من الزرع موجود فى كل المشاتل بكثرة ورخيص اوى فى المشاتل هتلاقوه فى حدود من 3:5 جنيه او من كلية الزراعة الشابة الجميلة سمسم جيباه بجنيه واحد لا غير
يارب يكون الزرع عجبكم وشجعكم انكم تشتروه
فى امان الله