بعض البنات أول ما تبدء سن العشرين .. تلاقي الام ربطت دماغها و لبستلها الحتة السودة ^^
وتقعد جمبها وتقولها : يابت إتلحلحي .. اخرجي و افرحي و حطي مكياج كده و خليكي زي البنت فلانة الي عندها 16 اتخطبت و بنت فلانه الي 19 سنة جايلها اول مولود
المهم البنت ياعيني تحس انها كبرت وعجزت ,,,,, وتبدءأ رحلة الضغينه على اصحابها المرتبطين ,, و تقعد تولول على عمرها و تعمل البدع في روحها ظناً منها يعني انه لازم تظهر حلاوتها وجمالها عشان سوقها يمشي ..
و تبدأ تلاقي قرايبها جايين صف كل الي تسلم تبوسها و تجز على سنانها و تقول : مفيش حاجة كده ولا كده ياختي ؟
تبدء البنت تحبط اكتر و تكتأب اكتر و تنطوى على نفسها و تعتزل العالم .. لمجرد اننا في مجتمع ثقافته محدودة بيشوفوا فيه ان الي توصل للعشرين خلاص لازم تتجوز و ان كل لحظة بتعدي فوق العشرين هي انذار خطر و صفارة الانذار بتدق وترن و تصرخ انك على ابواب العنوسة .
ومع اول واحد بيتقدملها ويدق بابها .. توافق عليه .. و تروح على الفيس بسرعة تحول الحالة من Single لـ Engaged
وتبدء احلام البنت و فكرتها عن الجواز تختلف و تتغير و تبصله على انه فستان فرح و قاعة و حتتين جاتوه و ساندوتش كفتة ..
و تتجوز الشابة
و تيجي تشيل هم البيت و العيال و المسئولية .. وتلاقي ان الجواز ده حاجة تانية خالص غير ما كانت متخيلاه ,, وتلاقي واحد غريب عنها لاعارفة تفهمه و لا قادرين يسعدوا بعض .
وترجع تقول : يارتني ما اتجوزت
ويرجعوا يقولولها . انتي قارفاني معاكي لا وانتي انسة مريحانا ولا انتي متجوزة مريحانا .
الخلاصة :
الجواز مش دبلة و شوية رسايل حب بينك وبين خطيبك و رومانسية
مينفعش توافقي على اي واحد و السلام ,,, بصيله كويس و قولي هو ده ابو اولادي .. هو ده شريك حياتي و عمري الي ينفع استغني عن الدنيا كلها عشانه .. و جوابك هو الي هيقرر هتوافقي عليه ولا لاء
مهما حصل خليكي جوهرة مصونة مش اي حد يتفرج عليها وتعجبه يشيل و يشتري .
خليكي زي ما انتي في حياتك والتزاماتك ومتتخليش عن اي مبدء عشان جنس مخلوق .
ابني نفسك وانجحي في دراستك او في شغلك و خلي ليكي شخصيتك المستقلة و متحاوليش تعتمدي في حياتك على حد
لان باختصار محدش هيخاف عليكي اكتر من نفسك
و الطيبون للطيبات .. طول ما انتي طيبة عمر ربنا ما هيوقعك فحاجة وحشة ..وربنا يرزق كل الينات بأزواج صالحين يتقوا الله في تعاملاتهم في حياتهم ومع زوجاتهم يارب
, ,